صاندو جيم


"نحن نحتاج إلى سرد جديد، سرد فيه - كما يقترح ستيف مينتز - حدائق أقل، ومزيد من حطام السفن،

سرد أكثر انسجاما مع الطبيعة المتغيرة للسواحل في عصر التغير المناخي الهائل هذا."

جون جيليس -

الحاج أحمد الديب هو صاحب أول جيم في شرق المدينة "صاندو جيم" شقة دور أرضي من 3 غرف وحمام وخن صغير لغيار الملابس، الجيم كان له يافطة عبارة عن صندوق أبيض مرسوم عليه بالإسود راجل فارد دراعاته ومكتوب بالأحمر "صاندو جيم" وجوَّه الصندوق ده لمبه نيون واحدة بس بتنوَّر كلمة "صاندو جيم" وباقي اليافطة مضلمة.

الحاج أحمد سافر بلجيكا في نص السبعينات اشتغل وفي نهايتها رجع إسكندرية فتح الجيم، الحاج أحمد الديب راجل وسيم شعره أبيض وناعم، وعينيه زرقا وأبيض، وجسمه قوي وممشوق، سلفي مربي دقنه ومقصَّر جلبابه الأبيض.

الجيم رغم إنه كان ضيق بس هوا، وعمرك ما تشم فيه ريحة عرق أو كمكمة، كل غرفة من الغرف التلاتة فيها شباك، الحاج أحمد ماكنش بيشغل أغاني ف الجيم، كان جايب راديو حاطه على خشبة عالية قرب السقف، ومظبط المؤشر بتاعه علي محطة القرآن الكريم، ومدلدل منه سلك الفيشة.. عايز تتسلى وإنت بتلعب تحط الفيشه ف الكهربا وتسمع إذاعة القرآن الكريم، مش عاجبك شيل الفيشة والعب في صمت.. أحسن ليك ولينا.

الدنيا اتغيرت في حقبة ما بعد "صاندو جيم". كانت طفرة إنك ممكن تروح جيم تسمع فيه حاجة غير إذاعة القرآن الكريم.. بس يمكن لطول حرمان الدنيا كانت متلخبطة شويَّه. أغاني جورج وسوف كانت مسيطرة بشدة على صالات الحديد ف المنطقه.. أغنية "قلب العاشق دليله" مرتبطه بتمرينة الضهر الأمامي… يوم الوداع تمرينة الساعد… صابر وراضي تمرينة البطن طبعا علشان إيقاعها راقص وسريع.. كان فيه مجموعة أصحاب مايتمرنوش غير على مواويل العزبي، وكان فيه موال ليه بيقول "وفـ صدري نور" ده أساسي كان بيشتغل ساعة تمرينة الصدر، وتلاقي الواحد فيهم بينتع البار وهو بيلعب بنش علوي والعزبي متألق فـ الخلفيه "وفـ صدري نور"… مجموعة منهم طلعوا في دور بودي جاردات في فيلم "55 إسعاف" يومها أجَّروا فيديو وتلفزيون وكلنا شوفنا الفيلم ف الجيم.

مرحلة ما بعد "صاندو جيم" كان فيه هاجس عند الأهالي إن صالة الحديد ممكن يكون مكان مناسب للتحرش بالأطفال؛ عرق وفانلات مقطَّعة وحمامات قذرة وحقن ديكا وأغاني جورج، ومواويل العزبي، وف صدري نور، أكيد فيه عيال بتتـ...ـاك جوه.

الحاج أحمد كان حاطط ورقة كرتون معلق فيها جدول التمارين الأزلي الوجودي:

اليوم الأول: صدر+ باي

اليوم التاني: ضهر + تراي

اليوم التالت: كتف + رجلين

الحيطان كانت متغطية بالملصقات بتاعة الأقصى عائد، و5 طرق للتوقف عن التدخين، وأضرار العادة السرية، وفوائد الاستغفار الصباحي بأشكال مختلفة، وبوسترات بتوضَّح وضعيات بعض التمارين، الحاج أحمد ماكانش بيحب يعلق بوسترات لأبطال اللعبة المشهورين، وكان شايف ده رخص وإدعاء وبعد عن روح اللعبة الأصلي، التمرينة عند الحاج أحمد ليها قواعد ماينفعش تخرج عليها وإلا ح يضطر آسفا إنه يمشّيك ومايستقبلكش ف الجيم تاني.

كولاج | عمر عادل

  1. ماحدش يناول لحد الدمبل أو الحديد ف إيد زميله.. تسيبه ع الأرض وزميلك ياخده من ع الأرض.

  2. اللي بيلعب "أعمى"؛ فلو ح تعدي جنبه يبقى إنت تخلي بالك.. اللي بيلعب ملك المنطقة اللي حواليه لحد لما يخلص عداته ويحط الحديد ع الأرض، ولو هو خبطك وهو بيلعب لازم تتأسف وقتي.

  3. محدش يساعد حد.. شيل على قدك.. كل واحد جاي ومعاه نفسين يلعب بيهم مش يضيعهم على مساعدة اللي حواليه.

  4. ممنوع الضرب نهائي.. لا مكملات ولا أمينو ولا هرمونات، وكان قاسي جدا فـ النقطة دي… الناس كانت بتجيب أزايز الميَّه معاها وهي خايفة.

  5. كان بيجبر اللعيبه القديمة اللي جسمها كويس وشادد إنها تتمرن "بفانلات" بكم حتى ف عز الصيف.. المكان مش للاستعراض والعضلة ممكن تتحسد… عمري فـ حياتي عند الحاج أحمد ما شُفت عضلة كبيرة.. العضلات الكبيرة بتتحجب.

  6. لو دخلت الحمَّام لازم وإنت خارج تمسح الأرض بالجلدة… مافيش فصال فـ النقطة دي.

ماعرفش أي حد من جيلي والأكبر مني من أول سيدي بشر لحد أبوقير لعب حديد ومايعرفش "صاندو جيم" وماخدش تمرينه عند الحاج أحمد، ف بداية الألفية أول صالة حديد تفتح فـ سيدي بشر قبلي كان "بوشه جيم" فـ ضهر جامع محمد فريد، وجه استأذن الحاج أحمد قبل ما يفتحه، برضه "كحيل جيم" عمل نفس القصة استأذن الحاج أحمد قبل ما يفتح.

المرحله دي مرحلة بطولات المناطق المجهوله.. بطولة شركة كهرباء أبوقير… بطولة صرف صحي المندره… بطولة نادي الفتح بالعصافره قبلي.. كنت أخش النادي من دول ألاقيه مليان شهادات تقدير متبروزه.

نجم شرق المدينة فـ الفترة دي كان لاعب اسمه "بومبه" م المندره أخد بطولة كهرباء أبوقير، وكانت وش الخير عليه إنه ياخد خامس فـ بطولة العالم للهواة… افتتاح أي جيم جديد كان لازم أول تمرينه فيه تبقى لــ "بومبه" من باب الدعاية والفخر.

الحاج أحمد كان بيشجع الناس إنها تصلي الفجر، وتيجي تاخد تمرينه قبل ما تروح الشغل أو الكليه.. كانت حاجه غريبه فشخ فـ التمانينات والتسعينات إنك تلاقي جيم فاتح وقت الفجر وفيه ناس بالهبل بتتمرن… هو نفسه كان مقسّم الأسبوع 3 تيام بيجري فيهم ع البحر بعد الفجر، والتلاته التانيين بيتمرن فيهم فـ الجيم برضه بعد الفجر مباشرة.

طول اليوم غالبا الحاج أحمد ماكانش بيبقى موجود فـ الجيم: بيجيب خضار من سوق شارع القاهرة.. بيصلي العصر فـ مسجد التائبين فـ شارع المسرح… واقف يهزر مع جماعة كفاتسه فـ شارع كشري هدير.. ماسك حد من بزازه بيأنبه إنه مابقاش ييجي الجيم، أو يستعجله ع الجواز، أو أي نصيحه تتطلب الإمساك ببزازه بقوه.

يوم كنت بأتمرن كتف فـ جيم ف شارع 66 ورانا، وكان فيه مجموعة شباب لسه راجعين من بطولة "شركة إسكندرية للزيوت المستخلصة". واحد كان بيحكي للتاني إن الكلام اللي داير فـ الجيم النهارده إن "رحيم بتاعه صغير".. كريم شافه وهو بيغيَّر وبيلبس "الاسبيدو" علشان يطلع يعرض فـ البطولة، وشاف بتاعه ساعتها، ولما رجع داير يقول إن رحيم بتاعه صغير، رحيم استنى لحد لما كريم جه الجيم وفجأه قلع الشورت ووقف بلبوص ف نص الجيم وبتاعه منتصب وبص لكريم وقال له "ده صغير يا ابن العرص؟" وفقعه قلم وهو عريان ف نص الصالة وبتاعه واقف.... افتكرت موضوع التحرش والأهالي الخايفة!

الحاج أحمد راجل زاهي باهي، ضحكته مجلجلة، صوته عالي، خطوته واثقة، حبُّوب لأقصى درجة، الحاجة الوحيدة اللي كنت بأستغربها عليه إن قعدته دايما كانت بتبقى مع راجل جاره كئيب غرائبي، وصل بيه التطرف إنه يسمي المحل بتاعه "استبرق" ويبيع فيه مكرونه سايبة جنب ترينجات بيت…"استبرق" للبقالة الجافة والملابس المنزلية.

عدّيت قريّب ع الحاج أحمد لقيته شال اليافطة النيون خالص، ولما دخلت الصالة لقيته مشخبط على وشوش الرجَّاله اللي فـ البوسترات التوضيحية، وكمان مشخبط ع المنطقة اللي ما بين السُّرة والركبة… أخدت تمرينه، وسِبت تمن الحصة عند صاحب محل "استبرق"، وروَّحت.

#عمرعادل #هيثمالشاطر #شرقالمدينة #جيم

743 views